PERINTAH BEGUNAKA SUKUNG RAYAT NGEMANSANGKA MENUA

MIRI: Perintah begunaka sukung penuh ari mensia mayuh kena nentuka Sarawak terus mansang kelebih agi ba pengawa ekonomi.

Menteri Muda Penyambung Datuk Lee Kim Shim madahka, sukung ari rayat beguna amat ngambika agenda pemansang ulih dipejalaika enggau mujur.

“Perintah menua begunaka sukung ari rakyat kena nentuka pengawa ekonomi maju agi,” ku iya.

“Kerejasama ari sida ulih nulung menua kitai majak ngerembai sereta nyadi menua ke lantang sereta ulih nyendiaka mayuh pengawa puang.”

Iya bejaku munyi nya ba pengerami rumah tebuka beserimbai enggau Taun Baru Cina (TBC) diatur Direktor Boulevard, Chong Ya Lun ba rumah Chong ditu malam kemari.

Lee ke lalu nyadi Menteri Lumba enggau Main madahka , raban bansa Cina patut terus bekerejasama enggau bansa bukai kena negapka pemansang ekonomi.

“Kelimpah ari ngembuan pengidup ti likun begulai enggau bansa bukai, raban bansa Cina mega patut bekerejasama enggau bansa bukai kena nentuka penegap ekonomi ba m enua tu,” ku iya.

Ku Lee, taun tu chukup besai endar reti laban Miri udah dipilih nyadi tuai rumah ke pengerami Rumah Tebuka Malaysia beserimbai enggau TBC ti dipejadika Menteri Besai Datuk Seri Mohd Najib Tun Razak kenaka 6 Februari tu tadi.

Kelimpah ari nya, iya ngarapka Taun Arnab baka ke taun tu mai pemanah ngagai semua ti bisi datai ba pengerami rumah tebuka nya.

“Ngarapka taun tu meri nasit manah ngagai kitai semua baka bulih pemisi, gerai sereta lantang,” ku iya.

Nyerumba nya, lebih 100 iku bala temuai ari pupu raban bansa enggau pengarap bisi datai. Pengawa nya diramika agi enggau belagu karaoke.

Taja pan seminggu udah lalu, pengawa ngintu TBC mengkang diintu sekeda mensia mayuh ba Miri.

Sama bisi ngulu pengerami nya Kaban Kunsil Nengeri (ADUN) Pujut Andy Chia Chu Fatt, Datuk Bandar Miri Lawrence Lai Yew Son enggau Kepala Polis Pelilih Mit Menua Miri, Asisten Komisioner Polis (ACP) Jamaluddin Ibrahim. - Utusan Borneo February 12,11